ਕਈ ਵਿਅਕਤੀ ਅਮਲ ਦੀ ਲੋਰ ਵਿੱਚ ਵਾਹਨ ਚਲਾਉਂਦੇ ਹਨ। ਜੋ ਕਿਸੇ ਦੀ ਜਾਨ ਲੈਣ ਦਾ ਕਾਰਨ ਬਣਦੇ ਹਨ। ਕਈ ਵਾਰ ਅਜਿਹੇ ਆਦਮੀ ਆਪਣੀ ਵੀ ਜਾਨ ਗੁਆ ਬੈਠਦੇ ਹਨ। ਜ਼ਿਆਦਾਤਰ ਹਾਦਸਿਆਂ ਦਾ ਕਾਰਨ ਅਮਲ ਦੀ ਵਰਤੋਂ ਹੈ। ਜਿਹੜੇ ਵਿਅਕਤੀ ਦਾਰੂ ਦੀ ਲੋਰ ਵਿੱਚ ਡਰਾਈਵਿੰਗ ਕਰਦੇ ਹਨ, ਟਰੈਫਿਕ ਪੁਲਿਸ ਉਨ੍ਹਾਂ ਦੇ ਚਲਾਨ ਵੀ ਕਰਦੀ ਹੈ ਪਰ ਇਹ ਵਿਅਕਤੀ ਫੇਰ ਵੀ ਪ੍ਰਵਾਹ ਨਹੀਂ ਕਰਦੇ।
ਨਾਭਾ ਦੇ ਬੌੜਾਂ ਗੇਟ ਵਿਖੇ ਇੱਕ ਟਰੱਕ ਹੇਠ ਇੱਕ ਸਾਈਕਲ ਸਵਾਰ ਦੇ ਆਉਣ ਨਾਲ ਉਸ ਦੀ ਜਾਨ ਚਲੀ ਗਈ ਹੈ। ਮਿਰਤਕ ਦੀ ਪਛਾਣ ਅਸ਼ੋਕ ਕੁਮਾਰ ਵਜੋਂ ਹੋਈ ਹੈ। ਉਸ ਦੀ ਉਮਰ 60-62 ਸਾਲ ਸੀ ਅਤੇ ਉਹ ਟੌਫੀਆਂ ਵੇਚਣ ਦਾ ਕੰਮ ਕਰਦਾ ਸੀ। ਘਟਨਾ ਸਮੇਂ ਅਸ਼ੋਕ ਕੁਮਾਰ ਸਾਈਕਲ ਸਮੇਤ ਸੜਕ ਪਾਰ ਕਰ ਰਿਹਾ ਸੀ।
ਉਸੇ ਸਮੇਂ ਪਟਿਆਲਾ ਵੱਲੋਂ ਟਰੱਕ ਆ ਗਿਆ। ਕਿਹਾ ਜਾ ਰਿਹਾ ਹੈ ਕਿ ਜਦੋਂ ਟਰੱਕ ਮੋੜ ਮੁੜ ਰਿਹਾ ਸੀ ਤਾਂ ਮੌਕੇ ਤੇ ਹਾਜ਼ਰ ਲੋਕਾਂ ਨੇ ਟਰੱਕ ਵਾਲੇ ਨੂੰ ਰੁਕ ਜਾਣ ਲਈ ਬੜਾ ਰੌਲਾ ਪਾਇਆ ਪਰ ਟਰੱਕ ਵਾਲੇ ਨੂੰ ਕੁਝ ਵੀ ਪਤਾ ਨਹੀਂ ਲੱਗਾ। ਟਰੱਕ ਅਸ਼ੋਕ ਕੁਮਾਰ ਦੇ ਉੱਤੋਂ ਲੰਘ ਗਿਆ। ਜਿਸ ਨਾਲ ਅਸ਼ੋਕ ਕੁਮਾਰ ਮੌਕੇ ਤੇ ਹੀ ਦਮ ਤੋੜ ਗਿਆ।
ਟਰੱਕ ਭਵਾਨੀਗੜ੍ਹ ਦਾ ਦੱਸਿਆ ਜਾਂਦਾ ਹੈ। ਟਰੱਕ ਵਾਲੇ ਤੇ ਦਾਰੂ ਦੀ ਲੋਰ ਵਿੱਚ ਹੋਣ ਦੇ ਵੀ ਦੋਸ਼ ਲਗਾਏ ਜਾ ਰਹੇ ਹਨ। ਅਸ਼ੋਕ ਕੁਮਾਰ ਦੀ ਮਿਰਤਕ ਦੇਹ ਹਸਪਤਾਲ ਵਿੱਚ ਰਖਵਾ ਦਿੱਤੀ ਗਈ ਹੈ। ਮਿਰਤਕ ਦੇ ਪਰਿਵਾਰ ਵਾਲੇ ਇਨਸਾਫ਼ ਦੀ ਮੰਗ ਕਰ ਰਹੇ ਹਨ।
